Elíza + fjórir í kvöld

Elíza Newman - oftast kennd við Kolrössu krókríðandi, en í seinni tíð stundum við kvennaklúbbinn Trúbatrixur - kynnir aðra sólóplötu sína, Pie in the Sky, á tónleikum á Café Rosenberg í kvöld.

Elíza stundar nú nám í London, en er mætt með alþjóðlega hljómsveit til að spila plötuna og fagna útgáfunni. Bandið skipa þeir Ken Rose á gítar, Alex Yeoman á bassa og Sy Davis á hljómborð og klukkuspil. Einnig er Gísli Kristjánsson í bandinu og spilar á trommur. Gísli tók plötuna upp og hljóðvann hana með Elízu í London. Hann er einnig poppari á eigin vegum og var tíðum líkt við Beck. EMI gaf út plötuna How about that með honum árið 2004.

Á Pie in the sky er frískandi draumapopp og hefur plötunni gengið vel, hún er uppseld á Íslandi. Nýtt upplag er komið með glænýju umslagi og verður platan seld á sérstöku tilboðsverði á tónleikunum í kvöld. Tvær hljómsveitir hita upp: krúttstelpurnar í Pascal Pinon og hljómveitin Andvari, sem skartar hinni efnilegu söngkonu og Trúbatrixu Myrru Rós. Tónleikarnir hefjast stundvíslega kl. 21.