Jenna Jameson kærir kærastann fyrir barsmíðar | Myndir

Fyrrum klámleikkonan Jenna Jameson og kærasti hennar, UFC-glímukappinn Tito Ortiz, eiga nú í deilu sem gæti leitt til forræðisdeilu yfir 13 mánaða gömlum tvíburum þeirra, Jesse og Journey.

Á mánudagskvöld kallaði faðir Jennu lögreglu til heimilis þeirra í Kaliforníu. Hjónin höfðu þá rifist heiftarlega og var Tito handtekinn. Stuttu seinna fór Jenna með risasólgleraugu út á hlað og ræddi við fjölmiðlamenn. Hún sýndi þeim áverka á olnboga og tilkynnti að hún myndi kæra glímukappann.

Seinna um kvöldið var Tito sleppt úr haldi og hélt hann þá blaðamannafund. Þar sagði hann Jennu vera háða verkjalyfinu OxyContin og hafa áður hótað sjálfsvígi. Ástæða rifrildisins væri að hún hefði tekið kast þegar hann fann skammt af lyfinu á heimilinu. Faðir hennar hefði þess vegna hringt á lögregluna. Tito sagði ekki rétt að hann hefði ráðist á Jennu, hún hefði dottið á olnbogann.

„Fólk sem tekur þetta lyf er með lélegt jafnvægisskyn," sagði hann og bætti við að fjölskylda Jennu stæði með honum í málinu. Svo fór hann að gráta á blaðamannafundinum og sagði foreldra sína einnig hafa glímt við fíkn.

Jenna neitaði þessum ásökunum skömmu seinna. Sagði glímukappann aðeins reyna að finna afsökun fyrir því að hafa ráðist á sig. „Við vorum að rífast og ég móðgaði hann. Þá greip hann mig og henti mér í baðkarið af slíkum krafti að axlarvöðvinn rifnaði," sagði Jenna.

Hún bætti við að allar vonir sínar um að ná saman á ný vegna barnanna hefðu brostið þegar hann ásakaði hana um lyfjanotkunina. Vegna aðgöngubanns eftir handtökuna má parið ekki hittast í einn mánuð. Þau byrjuðu saman árið 2006.