Vonast eftir rúmum 32 milljónum

„Þetta verða meiriháttar tónleikar eins og þeir hafa verið síðustu ellefu ár,“ segir Einar Bárðarson um hina árlegu tónleika fyrir Styrktarfélag krabbameinssjúkra barna, eða SKB, sem verða haldnir á laugardaginn. „Það besta við þá verður að afhenda peningana í hléinu,“ segir hann. Allur ágóði rennur til SKB og allir sem koma að tónleikunum gefa vinnu sína.

Blaðamannafundur var haldinn í anddyri Háskólabíós í gær þar sem helstu flytjendurnir mættu á staðinn ásamt öðrum aðstandendum og lögðust tónleikarnir vel í mannskapinn. Á meðal þeirra sem stíga á svið verða Sálin hans Jóns míns, Ingó og Veðurguðirnir, Buff, Dikta, Hafdís Huld, Jóhanna Guðrún og félagarnir Friðrik Ómar og Jógvan. Að sögn Einars eru Dikta og Hafdís Huld að koma fram í fyrsta sinn á tónleikunum auk þess sem Jóhanna Guðrún stígur þar á svið í fyrsta sinn í sex ár. Sálin hans Jóns míns er aftur á móti margreynd. „Sálin er búin að vera frá upphafi. Ég er farinn að líta á þá sem verndara tónleikanna,“ segir Einar í léttum dúr.

Á undanförnum árum hafa yfir 30 milljónir króna safnast á þessum tónleikum og nú er markmiðið að sú upphæð hækki í 32,5 milljónir. Tónleikarnir hefjast klukkan 16 í Háskólabíói og fer miðasala fram á Midi.is. - fb