Handleggsbraut hljómsveitarfélaga sinn

„Ég get ekki spilað á gítarinn, en ég prófa að spila á bassa,“ segir Björgvin Ívar Baldurs­son, gítarleikari hljómsveitanna Lifun og Klassart.

Björgvin spilar fótbolta með utandeildarliðinu FC Keppnis ásamt Smára Guðmundssyni, félaga sínum í báðum hljómsveitunum. Þegar hann hugðist verja þrumufleyg frá Smára á æfingu á dögunum vildi ekki betur til en boltinn hafnaði í úlnliði Björgvins og braut það sem fyrir varð.

„Æfingin var að verða búin. Ég var kominn í stellingu og var að fara að skutla mér eftir skoti Smára, þá negldi hann beint á mig – í punghæð,“ rifjar Björgvin upp. „Þá var ég með höndina fáránlega staðsetta og fékk boltann í úlnliðinn. Ég sá svart og engdist af sársauka.“ Óhappið kom á versta tíma fyrir Björgvin, en hann sér ekki fram á að geta leikið á gítar með hljómsveitunum sínum á þessum annasamasta tíma ársins. Hann hyggst þó reyna að bíta á jaxlinn, kyngja verkjalyfjum og spila áfram á bassa með kántríhljómsveit Selmu Björnsdóttur.

„Ég ætla að reyna að haga þessu þannig að þetta verði ekki tekjutap. Það er aðallega peningur í jólahlaðborðunum og ég ætla að reyna að redda mér á bassanum,“ segir hann og bætir við að hann sé þegar búinn að finna varamann á gítarinn í Lifun. Sá heitir Birkir Hrafn Gíslason og hefur þegar leyst Björgvin af á tvennum tónleikum. „Það er helvíti fínt,“ segir Björgvin. „Ég gat séð Lifun á tónleikum tvo daga í röð.“

- afb