Lok, lok og læs á Grand Rokki

„Þangað til maður fréttir annað þá lítur út fyrir að við þurfum að færa keppnina,“ segir Gunnar F. Árnason, sem stendur fyrir spurningakeppninni Drekktu betur á Grand Rokki á föstudögum. Menningarknæpunni Grand Rokki var fyrirvaralaust lokað á þriðjudagskvöld. Samkvæmt upplýsingum Fréttablaðsins var staðnum lokað að kröfu leigusala. Það hefur ekki fengist staðfest og ekki náðist í Þorstein Þórsteinsson veitingamann í gær.

Drekktu betur verður haldin á 46 Gallery Bar sem er til húsa á Hverfisgötu 46.

„Hún verður að óbreyttu þar. Þetta hefur alltaf verið systurstaður Grand Rokks,“ segir Gunnar sem telur þetta mikil tíðindi fyrir fastagestina.

„Þetta er stór breyting. Spurningakeppnin hefur aldrei verið haldin hér áður,“ segir Gunnar sem var einmitt staddur í vettvangskönnun á nýja staðnum þegar Fréttablaðið ræddi við hann í gær. Gunnar hvetur aðdáendur Drekktu betur til að fylgjast með frekari fregnum á Facebook-síðu keppninnar eða á drekktubetur.is. Spyrill í Drekktu betur á morgun er spurningaljónið og fréttamaðurinn Sveinn Guðmarsson.

- hdm