Flytur lög Leonards Cohen

Tónlistarmaðurinn og rithöfundurinn Valur Gunnarsson heldur tónleika á Café Rosenberg á sunnudagskvöld þar sem hann syngur lög kanadíska söngvaskáldsins Leonards Cohen.

Að sögn Vals er þrenns konar tilefni til tónleikahalds. Hið fyrsta er að tíu ár eru liðin síðan platan hans, Reykjavík er köld, kom út þar sem hann söng lög Leonards Cohen við íslenska texta.

„Ég hef aldrei spilað hana opinberlega hér en mér var boðið á Leonard Cohen-festival í Minneapolis árið 2001 þar sem hún var frumflutt,“ segir Valur. „Það er kannski kominn tími til. Þetta er svona vetrarrómantík og það vill svo heppilega til að það er byrjað að snjóa aftur.“

Valur segist hafa fengið lítil sem engin viðbrögð við plötunni þegar hún kom út hér heima árið 2000. „Ég hef ekkert verið að kynna hana. Á hinn bóginn skilst mér að Eyjólfur Kristjánsson hafi verið búinn að panta það að vera með fyrstu plötu aldarinnar, ef maður trúir því að öldin hafi byrjað árið 2000. Hún klikkaði eitthvað í framleiðslunni og kom of seint þannig að ég held að fyrir algjöra slysni hafi þetta verið fyrsta platan,“ segir hann og brosir.

„Ég fékk mjög skemmtileg viðbrögð frá þýsku tímariti. Það sagði að ef Cohen væri guðfaðir þunglyndisins þá léti hinn íslenski Cohen hann hljóma glaðan í samanburðinum.“

Annað tilefni er 75 ára afmæli Cohens í fyrra. „Mig langaði að gera eitthvað af því tilefni en hef ekki komið því í verk,“ segir Valur og bætir við að hann hafi séð Cohen spila síðustu tvö sumur í Noregi.

„Umboðsmaðurinn hans seldi allt heila klabbið meðan hann [Cohen] var í klaustri, allan höfundarréttinn. Þannig að á gamalsaldri fór hann á hausinn og þurfti að byrja að túra aftur. En ég vil taka það fram að þetta eru ekki styrktartónleikar. Aðgangur er ókeypis,“ segir hann og hlær.

Þriðja tilefnið er það að Valur er orðinn 33 ára, eða jafngamall og Cohen var þegar hann gaf út sína fyrstu plötu.

„Ég held ég sé farinn að eiga eitthvað í þetta núna. Maður verður að hafa gengið í gegnum ákveðið mörg misheppnuð ástarsambönd og almenn vonbrigði áður en maður getur farið að syngja þessi lög af einhverri sannfæringu.“

En hvað er svona heillandi við Cohen? „Hann á vel við á norðurslóðum. Hann er frá Kanada og er gríðarlega vinsæll á Norðurlöndunum. Hann er fyrst og fremst ofboðslega fær textahöfundur.“

Valur verður einn á sviðinu á Rosenberg þar sem hann flytur lög Cohens og segir einnig ýmsar skemmtilegar sögur. Tónleikarnir hefjast klukkan 21.

freyr@frettabladid.is