Sykurmolar kynna verðlaun

Sykurmolarnir fyrrverandi, Sigtryggur Baldursson og Margrét Örnólfsdóttir, verða kynnar á Íslensku tónlistarverðlaununum sem verða afhent í Íslensku óperunni 13. mars.

„Ég hlakka til að gera þetta. Ég fæ góðan stuðning frá Margréti. Þetta er hernaðarleyndarmál hvað við ætlum að gera en við erum að plotta ýmislegt. Þetta verður gaman,“ segir Sigtryggur Baldursson, sem verður í fyrsta sinn í hlutverki kynnis á Íslensku tónlistarverðlaununum.

Dagskrá Sigtryggs verður stíf í kjölfar Íslensku tónlistarverðlaunanna því síðar um kvöldið syngur hann með Milljónamæringunum á árshátíð 365 og á sunnudeginum flýgur hann út til Kaupmannahafnar þar sem hann spilar undir hjá Lay Low. Kvöldið eftir spila þau saman í Gautaborg en í bæði skiptin munu þau hita upp fyrir hina þekktu hljómsveit The Dave Matthews Band. Í framhaldinu flýgur Sigtryggur til Asíu vegna nýrrar íslenskrar heimildarmyndar um asíska fílinn sem Profilm framleiðir, eins og Fréttablaðið hefur áður greint frá. Semur hann tónlistina í þeirri mynd.

Á meðal hljómsveita sem munu stíga á svið á Íslensku tónlistarverðlaununum verða Hjaltalín, Dikta og Feldberg. Einnig munu þeir Daníel Bjarnason og Víkingur Heiðar leika listir sínar. Um fimm hundruð manns verða gestir á hátíðinni og verður hún sýnd í beinni útsendingu á Stöð 2. Um hundrað manns sem eru ekki í tónlistarbransanum geta keypt sér miða. Kostar hann 2.000 krónur og hefst miðasala í Íslensku óperunni á mánudaginn. freyr@frettabladid.is