Snoop má fara til Bretlands

Bandaríski rapparinn Snoop Dogg hefur unnið fullnaðarsigur í fjögurra ára baráttu sinni fyrir því að fá að snúa aftur til Bretlands. Stjórnvöld í Bretlandi settu honum stólinn fyrir dyrnar eftir átök á Heathrow-flugvelli árið 2006.

Nú hefur dómstóll í Bretlandi úrskurðað að hlutdeild Snoops í átökunum fyrir fjórum árum hafi verið minni háttar og ekki eigi að meina honum um vegabréfsáritun til Bretlands í framtíðinni. Snoop hafði nokkrum sinnum reynt að fá úrskurðað sér í hag en innflytjendayfirvöld gáfu ekki eftir fyrr en nú.

Átökin sem brutust út á Heathrow árið 2006 voru vegna þess að föruneyti Snoops var meinaður aðgangur að sal British Airways sem ætlaður er farþegum á fyrsta farrými. Sjö lögreglumenn slösuðust í átökunum og Snoop þurfti að eyða nótt í fangaklefa. British Airways setti hann í lífstíðarbann.

Snoop er 38 ára gamall og heitir réttu nafni Calvin Broadus. Hann er einn af þekktustu rapptónlistarmönnum heims. Nýjasta verkefni hans er að ljá rödd sína á nýju Gorillaz-plötuna. Það gæti því verið að óskað sé eftir starfskröftum hans í Bretlandi til að kynna þá plötu.