Plötukynning Hudson

Hljómsveitin Hudson Wayne er snúin aftur með sjö laga plötuna How quick is your fish? Þetta er fyrsta platan frá sveitinni síðan Battle of the Banditos kom út árið 2005. Sem fyrr er Þráinn Óskarsson í framlínu bandsins, semur texta og kemur með grindur að lögum. Ólafur Jónsson gítarleikari er nýjasti meðlimur kvartettsins. „Ég held að það sé bara upp á stemninguna að það eru bara sjö lög á plötunni,“ segir hann. „Fólk hefur þá tækifæri til að hlusta á plötuna alla án þess að hiksta.“

Mannabreytingar og nám í útlöndum hefur orsakað þetta fimm ára útgáfuhlé en nú er Ólafur á því að allt verði sett í gang og nýtt efni búið til. Tónlist sveitarinnar er tilfinningaríkt kántrískotið rokk og hljómsveitin stendur fyrir tveimur plötukynningum um helgina. Fyrst í dag í 12 tónum á Skólavörðustíg kl. 17, svo á morgun kl. 16 í menningarmiðstöðinni Havarí í Austurstræti. Þar kemur My Summer as a Salvation Soilder einnig fram.

Í lok mánaðarins mun Hudson Wayne svo halda í tónleikaferð um Þýskaland og Austurríki ásamt hljómsveitinni Seabear. „Er það ekki eina leiðin til að komast til útlanda þessa dagana?“ spyr Ólafur. Að þeirri ferð lokinni er stefnt á að halda veglega útgáfutónleika. - drg