Frelsisveit Nýja Íslands

Tónlistarveislan Vetrarjazz heldur áfram í kvöld. Klukkan 23 leikur Frelsissveit Nýja Íslands á Café Kultura við Hverfisgötu.

Blástursleikarinn Haukur Gröndal fer þar fremstur í flokki: „Nafnið á hljómsveitinni er leikur að orðum,“ segir hann. „Þetta með frelsið bendir til innihaldsins. Þetta er aðeins yfir í frjálsari form innan djassins. Það er smá bit í þessu, meira en í „mainstream“ dótinu, eða hvað á að kalla það. Önnur vísun í nafninu er í hljómsveit sem Carla Bley var með og hét Liberation Orchestra.“

Haukur hefur útsett og samið lögin á efnisskránni, sem er stíllegur hrærigrautur, blanda af dulúð og krafti, frjálsum og fastari formum. Með honum spila Óskar Guðjónsson, Snorri Sigurðarson, Valdimar Kolbeinn Sigurjónsson, Þorgrímur Jónsson, Scott McLemore og hinn sextán ára básúnuleikari Bergur Þórisson. „Hann er að stíga sín fyrstu skref sem alveg fauta talent á básúnuna í þessu djassveseni. Hann kemur við sögu með okkur hinum sekkjunum sem erum í þessu.“

Áður en Frelsissveitin stígur á svið verður hægt að hlýða á Frisell Project með Sunnu Gunnlaugsdóttur, Róbert Þórhallssyni og Scott McLemore frá kl. 22. Aðgangseyrir er 2.000 kr. á bæði atriðin og húsið opnar kl. 20.- drg