Stór plötusnúðakeppni haldin

Plötusnúðakeppni verður haldin á Nasa laugardaginn 25. september. Þar verður keppt í tveimur aldurshópum, fyrir 12 til 20 ára og 20 til 40 ára.

„Okkur finnst senan hérna á Íslandi vera svo lokuð. Við viljum fá að sjá hvað krakkarnir eru að gera í kjallaranum heima hjá sér,“ segir Andrés Bertelsen, sem skipuleggur keppnina ásamt Pétri Kristófer Oddssyni.

Dómnefndin verður ekki af verri endanum. Hún verður skipuð reynsluboltunum Dj Margeiri, Jóni Atla, Casanova, Adda Exos og Dj Sóleyju. Hver keppandi hefur tíu mínútur til að sýna listir sínar og vinningshafar fá síðan að láta ljós sitt skína að keppni lokinni. Gefin verða verðlaun fyrir þrjú efstu sætin í hvorum flokki. Sérsmíðaðir hringir verða í verðlaun, inneign á húðflúrstofu, plötusnúðagræjur og fleira. Kynnir verður Erpur Eyvindarson.

Andrés og Pétur vilja með keppninni breyta viðhorfi fólks gagnvart raf- og hip hop-tónlist sem þeim finnst hafa verið full neikvætt. „Álit fólks á þessari tónlist hefur verið tengt svolítið eiturlyfjum og öðru. Á sínum tíma var rokkið tónlist djöfulsins og hip hopið tengt glæpamenningu en svo hefur þetta breyst. Við stefnum á að gera þetta á hverju ári og vonum að þetta verði enn þá stærra,“ segir Andrés.

Plötusnúðakeppnin fyrir yngri keppendurna hefst klukkan 14 og sú síðari klukkan 21. Ágóði af 12-20 ára keppninni rennur óskiptur til Vímulausar æsku. Á meðal annarra flytjenda sem troða upp verður breski plötusnúðurinn King Unique, Captain Fufanu, Original Melody og Dj Leibbi. Skráning fer fram á Djkeppni.is. - fb