Eðlur og slöngur í Húsdýragarðinum í sumar

„Hvað mig persónulega varðar þá dreymdi mig aldrei um að fá svona safn. Þetta er þvílíkur happafengur fyrir gesti garðsins,“ segir Tómas Óskar Guðjónsson, forstöðumaður Fjölskyldu- og húsdýragarðsins. Garðinum áskotnaðist nýlega eitt stærsta safn uppstoppaðra fugla og spendýra sem um getur á landinu. Í því er að finna margs konar spendýr, leðurskjaldböku og ótalmargar fuglategundir. „Það var þekktur endurskoðandi í bænum sem dó nýlega og skildi eftir sig þetta safn. Fjölskyldan áttaði sig á því hvað það var stórt og umfangsmikið og ákvað að fela Húsdýragarðinum að gæta þess,“ útskýrir Tómas.

Garðurinn verður tuttugu ára í ár en hann var opnaður þann 19. maí árið 1990. Tómas á von á því að gestir garðsins eigi eftir að njóta afmælisins og búast má við nýjum gestum. „Við eigum von á einhverjum afmælisgjöfum,“ segir Tómas. Fyrir utan uppstoppaða safnið má þar kannski helst nefna að tvær slöngur og tvær eðlur verða meðal íbúa safnsins á afmælisárinu. Búið er að setja upp sérstök búr og starfsfólk garðsins hefur verið þjálfað í meðferð slíkra tegunda en þær hafa ekki áður verið til sýnis á Íslandi. „Þetta er annars vegar bóaslanga sem er kyrkislanga og svo svokallaður kornsnákur sem er svartur og rauður og er því alveg eins á litinn og önnur tegund eitraðra snáka,“ útskýrir Tómas og tekur fram að hvorug þessara tegunda sé þó hættuleg. Eðlurnar eru líka tvær; önnur er iguana-eðla og hin skeggdreki. Rétt er að taka fram að þær tvær eru heldur ekki hættulegar.

Tómas segir starfsfólk garðsins viðbúið miklu fjölmenni í sumar því búast má við að enn fleiri ferðist um landið á þessu ári heldur en hefur verið undanfarin ár. „Aðsóknin í garðinn hefur verið í svona fimm ára sveiflum og okkur finnst við vera í mikilli uppsveiflu núna.“ freyrgigja@frettabladid.is