Die Hard í fimmta sinn

Framleiðsla á fimmtu Die Hard-myndinni er fyrirhuguð á næsta ári er haft eftir aðalleikaranum Bruce Willis. Hann telur mögulegt að sögusviðið verði ekki í Bandaríkjunum.

„Við verðum að fara með þessa mynd vítt um heiminn,“ sagði Willis. Aðdáendur löggunnar og harðjaxlsins Johns McClane geta því farið að spenna beltin fyrir enn eina rússíbanareiðina. Þrjú ár eru liðin síðan fjórða myndin í seríunni, Live Free or Die Hard, kom út við góðar undirtektir. Þá voru tólf ár liðin frá gerð þriðju myndarinnar, Die Hard: With A Vengeance.