Elskaði aðeins Sam

Leikkonan Lindsay Lohan veitti breska götutímaritinu The Sun viðtal fyrir stuttu. Viðtalið var birt í tveimur hlutum og ræddi leikkonan meðal annars um fíkniefnavanda sinn, erfiða æsku og um samband sitt við plötusnúðinn Samönthu Ronson.

„Ég hafði aldrei laðast að konum áður en ég kynntist Sam. Þetta gerðist bara og það kom mér á óvart. Við erum enn í sambandi, við búum í sömu byggingu í Los Angeles og rekumst því oft á hvor aðra. Hún hefur alltaf verið ein af mínum nánustu vinkonum og ef hún væri ekki inni í myndinni þá væri ég líklega með karlmanni. Hún er eina konan sem ég hef getað hugsað mér að vera með. Við elskum hvor aðra og það eru líkur á að við munum einhvern tímann ná aftur saman,“ sagði Lohan.

Leikkonan telur að fjölskylda Ronson hafi aldrei tekið sig í sátt og hafi það haft slæm áhrif á sambandið. Hún segir jafnfram að þær hafi átt saman fleiri góðar stundir en slæmar, en að fjölmiðlar hafi aðeins flutt fréttir af því sem miður fór.

„Góðu stundirnar voru fleiri en þær slæmu. Það skiptast á skin og skúrir, það er eðlilegt. En þegar maður er opinber persóna þá hafa fjölmiðlar meira gaman af því að einblína á það sem er slæmt og blása það upp og láta líta svo út að hlutirnir séu verri en þeir eru.“