Borgarleikhúsið stefnir hátt í vetur

Borgarleikhúsið svipti hulunni af næsta leikári í dag en bæklingi frá leikhúsinu er dreift á öll heimili. Stóru leikhúsin tvö haldast í hendur í þessum málum. Þjóðleikhúsið kynnir sitt leikár á morgun en þá fylgir bæklingur þess með Fréttablaðinu.

Magnús Geir Þórðarson Borgarleikhússtjóri og hans fólk stefna á að standa sig jafn vel og í fyrra. Þá var sett met í aðsókn, áskritarkortasölu og Grímutilnefningum.

Fjölmargar sýningar verða í boði, nýjar og frá fyrra leikári. Við rennum yfir nokkrar þeirra hér fyrir neðan en hægt er að kynna sér leikárið betur á vef Borgarleikhússins.

Fólkið í kjallaranum

Í október verður frumsýnd leikgerð Ólafs Egils Egilssonar á samnefndri sögu Auðar Jónsdóttur, sem vann Íslensku bókmenntaverðlaunin árið 2004. Auður er einmitt fyrsta fastráðna leikskáld Borgarleikhússins og vinnur nú að ritun verks fyrir leikhúsið.

Kristín Eysteinsdóttir leikstýrir. Með aðalhlutverk fara Ilmur Kristjánsdóttir, Guðjón Davíð Karlsson, Sigrún Edda Björnsdóttir, Jóhann Sigurðsson og Þröstur Leó Gunnarsson.

Húsmóðirin

Vesturport frumsýnir farsakennda gamanleikinn Húsmóðurina í apríl. Í viðtali sem lesa má hér á Vísi sagði Gísli Örn að hugmyndin hafi kviknað í kringum fréttir af mansali og vændi á Íslandi.

„Þetta var á þeim tíma þar sem við veltum því fyrir okkur hvað við ættum að gera næst. Og í kjölfarið vildum við fjalla um húsmóður sem er ekki öll þar sem hún er séð og hvað það þýðir að vera húsmóðir," sagði Gísli.

Verkið er skrifað af Víkingi Kristjánssyni, Birni Hlyni Haraldssyni, Nínu Dögg, Jóhanni Níels og Gísla Erni.

Nei, ráðherra!

Magnús Geir leikhússtjóri sest í leikstjórastólinn eftir áramót og heldur um taumana á farsanum Nei, ráðherra!

Búast má við miklu fjöri og skemmtilegum hópi leikara. Verkið hlaut Oliver verðlaun sem besti gamanleikurinn í Bretlandi og hefur slegið rækilega í gegn víða. Gísli Rúnar Jónsson þýðir.

Ofviðrið

Jólasýning Borgarleikhússins er Ofviðri Shakespeares í meðförum eins fremsta leikstjóra heims, Oscaras Korsunovas.

Undibúningur hefur staðið í tvö ár og hér öllu er tjaldað til - að sýningunni koma Íslenski dansflokkurinn, sterkur hópur listrænna stjórnenda og meðal leikara eru Hilmir Snær Guðnason og Ingvar E. Sigurðsson.

Strýhærði Pétur

Í mars verður frumsýnt óhefðbundið verk, hryllilega krassandi ruslópera með tónlist Tiger Lillies. Þessi verðlaunasöngleikur er byggður á gömlum barnagælum þar sem svartur húmor og grípandi tónar ráða ríkjum.

Áhorfendur eru leiddir um rýmið í óvenjulegu standandi leikhúsdjammi, segir í tilkynningu. Leikstjórn er í höndum Jóns Páls Eyjólfssonar en leikarar eru Hilmir Snær Guðnason, Halldóra Geirharðsdóttir, Halldór Gylfason, Þröstur Leó Gunnarsson, Kristín Þóra Haraldsdóttir, Hallgrímur Ólafsson og Hallur Ingólfsson.

Horn á höfði

Horn á höfði var valin barnasýning ársins á Grímunni í vor. Verkið var sýnt í Grindavík en mætir á litla sviðið í Borgarleikhúsinu í haust.

Horn á höfði er grallaralegt ævintýri eftir Berg Þór Ingólfsson og Guðmund Brynjólfsson en Bergur er einnig leikstjóri. Verkið segir frá Birni sem vaknar einn morguninn með horn á höfðinu. Hann fær vinkonu sína til að hjálpa sér við að rannsaka málið og þá upphefst atburðarás á mörkum ævintýris og veruleika. Víðir Guðmundsson, Sveinn Ólafur Gunnarsson og Sólveig Guðmundsdóttir leika.

Elsku barn

Ung móðir er sökuð um að hafa myrt börn sín tvö. Þó er alls ekki ljóst hvort um morð er að ræða eða sorglegt slys. Málið vekur athygli almennings og áhuga hinna ólíklegustu aðila. Leikritið er byggt á opinskáum viðtölum við alla aðila málsins.Jón Páll Eyjólfsson leikstýrir.