Kemur sér í gírinn á Cadillac

„Ég er bara að koma mér í gírinn,“ segir söngvarinn Friðrik Ómar sem rúntar um höfuðborgarsvæðið þessa dagana á glæsilegri, hvítri Cadillac-bifreið í tilefni af Elvis-tónleikum sínum í Salnum. „Ég verð á honum fram á miðvikudag, þegar síðustu tónleikarnir eru búnir.“

Örfáir miðar eru eftir á upphaflegu tónleikana og því hefur tveimur aukatónleikum verið bætt við. Þeir verða á laugardaginn, rétt eins og þeir fyrstu, og á miðvikudaginn eftir viku.

„Ég fór á Facebook og spurði hvort fólk þekkti einhvern sem væri með Cadillac. Ég var kominn með símanúmer og eigandann eftir fimm mínútur,“ segir Friðrik Ómar.

„Tenging Elvis við Cadillac er gríðarlega mikil. Þetta var það fyrsta sem hann keypti eftir að hann sló í gegn, þegar hann gaf foreldrum sínum Cadillac. Hann var reyndar bleikur en þessi er hvítur. Þetta var eitt af hans sérkennum.“

Tónleikarnir í Salnum verða haldnir í tilefni af 75 ára afmæli Elvis. Farið verður yfir feril kóngsins þar sem lög á borð við Jailhouse Rock, Love Me Tender og Can"t Help Falling in Love verða á efnisskránni. Þetta er í sjöunda sinn á fimm árum sem Friðrik heldur Elvis-tónleika.

„Ég geri þetta annað slagið og það hefur alltaf verið troðfullt. Elvis á svo marga aðdáendur.“

- fb