Hoppípolla ofnotað á BBC

Jón Þór Birgisson segir að laginu Hoppípolla með Sigur Rós hafi verið „nauðgað“ í bresku sjónvarpi. Í viðtali við síðuna Gigwise segist Jónsi vera ósáttur við hversu litla stjórn hljómsveitin hefur á því hvernig tónlist hennar er notuð í Bretlandi.

„Á einhvern undarlegan hátt þarf breska ríkissjónvarpið ekki að biðja um leyfi til að nota lög ef þau eru í bakgrunni í sjónvarpsþáttum. Það getur bara tekið þau traustataki og það gerðist oft með Hoppípolla,“ sagði Jónsi. Reyndar er hann ánægður með að lagið hafi verið spilað í náttúrulífsþættinum Planet Earth.

„Þátturinn með David Attenborough var samt flottur (Planet Earth). Við erum allir miklir aðdáendur hans.“

Jónsi segist vera hættur að æsa sig of mikið yfir þessari notkun á Sigur Rósar-lögunum. „Ég hef lært að maður verður að láta hlutina eiga sig. Þú lifir í smá stund og deyrð síðan. Ekkert annað skiptir sérstaklega miklu máli.“ - fb