Gildran fagnar stórafmæli í kvöld

Hljómsveitin Gildran úr Mosfellsbæ heldur upp á þrjátíu ára afmæli sitt með tónleikum í Hlégarði í kvöld. Sveitin gaf á sínum tíma út sex plötur en lagðist í dvala þegar sú síðasta kom út árið 1997.

„Það kom í raun aldrei annað til greina en að gera þetta hérna heima. Við erum ákaflega spenntir fyrir þessum tónleikum," segir Karl Tómasson, trymbill Gildrunnar og forseti bæjarstjórnar í Mosfellsbæ. „Við erum búnir að fá sterk viðbrögð og þetta verða skemmtilegir tónleikar, ég get lofað því. Æfingar hafa gengið eins og í sögu og það er líka svo gaman að hittast. Það er alltaf mikið hlegið," segir Karl.

Undanfarin ár hefur hann verið á kafi í stjórnmálunum. Á sama tíma hefur Þórhallur Árnason bassaleikari starfað sem lögregluvarðstjóri á Eskifirði, Sigurgeir Sigmundsson gítarleikari unnið hjá Félagi íslenskra hljómlistarmanna og Birgir Haraldsson söngvari starfað sem verkstjóri hjá Ístex. Það er því ekki á hverjum degi sem þeir félagar geta hist til að rifja upp gamla tíma.

„Um leið og við ákváðum að koma saman að nýju og halda upp á þetta þrjátíu ára samstarf ákváðum við líka að taka upp nýtt lag," segir Karl og á þar við Blátt, blátt sem er komið í spilun á Rás 2. Lagið er eftir Birgi söngvara en textinn eftir Vigdísi Grímsdóttur skáld. Þetta er fyrsti dægurlagatextinn sem Vigdís semur.

„Það var frábært að vinna með henni, við erum afskaplega þakklátir fyrir það. Þetta var hugmynd sem dúkkaði upp hjá okkur, bara vegna aðdáunar okkar á henni sem rithöfundi." Lagið var það fyrsta sem var tekið upp í hinu glænýja hljóðveri Protime. Eigandi þess er Nikulás Róbertsson sem hefur leikið á hljómborð með Paradís og Start.

Karl útilokar ekki að fleiri Gildru-lög séu væntanleg, sem ætti að kæta fjölmarga aðdáendur sveitarinnar hér á landi. „Það er ekki hægt að neita því að svona endurfundir koma blóðinu svolítið á hreyfingu. Ég er alls ekkert frá því að við eigum eftir að koma út að minnsta kosti einni plötu áður en við segjum þetta gott."

freyr@frettabladid.is