Ferguson hringdi í Rooney

Sir Alex Ferguson, stjóri Man. Utd, hefur áhyggjur af Wayne Rooney og félögum í enska landsliðinu sem hafa ekki náð að sýna sitt rétta andlit á HM. Ferguson ákvað að taka málin í sínar hendur og hringdi í Rooney til þess að peppa leikmanninn upp.

"Það getur verið erfitt að takast á við miklar væntingar. Mér finnst það vera þannig hjá landsliðinu. Ég ræddi við Rooney og sagði honum að slaka á og njóta þess að spila á mótinu. Mér finnst vera allt of mikil taugaspenna í hópnum hjá enska liðinu og hún er greinilega að trufla liðið," sagði Skotinn sigursæli sem hefur ekki verið hrifinn af keppninni.

"Keppnin hefur valdið vonbrigðum en ég bjóst við því. Gæðin eru ekki nógu mikil. Leikirnir á mótinu hafa engan veginn heillað mig. Tímabilið er erfitt og sérstaklega á Englandi. Leikmenn voru síðan að hittast 3-4 dögum eftir að tímabilinu lauk og hafa verið saman síðan. Það er erfitt að ætlast til þess að leikmenn nái að sýna sitt besta eftir svona erfitt tímabil."