Terry biðst afsökunar - Stór mistök segir Capello

John Terry hefur beðið Fabio Capello, landsliðsþjálfara Englands, og liðsfélaga sína í enska landsliðinu afsökunar á ummælum sem hann lét falla á blaðamannafundi um helgina.

Á fundinum sagði Terry að hann og fleiri væru til í að setja sig upp á móti ákvörðunum þjálfarans. Hann gaf einnig í skyn að Joe Cole ætti að vera í byrjunarliðinu.

Capello var allt annað en sáttur við þessi ummæli Terry og sagði þennan fyrrum fyrirliða landsliðsins hafa gert stór mistök með ummælum sínum. Terry hefur nú svarað því til að allir í hópnum, hann þar á meðal, standi við bakið á þjálfaranum.

"Ég fór á blaðamannafundinn og ætlaði að vera heiðarlegur. Ég var spurður út í Joe Cole og kannski gekk ég of langt í ummælum mínum," sagði Terry.

"Ég ætlaði mér aldrei að koma þjálfaranum eða leikmönnum í uppnám. Ef ég móðgaði einhvern þá biðst ég afsökunar. Ég hef tjáð þjálfaranum að hann eigi minn stuðning og ég vil taka það fram að mér finnst ég ekki hafa komið á óróa í hópinn. Ég vil gjarna leggja þetta atvik til hliðar og einbeita mér að stórleiknum sem er fram undan. Eina sem ég reyndi að koma á framfæri var hversu mikilvægt það er fyrir mig að vinna HM."