Veðurguð sem Buddy Holly

Verið er að undirbúa uppsetningu á söngleik um hinn vinsæla söngvara Buddy Holly í nýuppgerðum Austurbæ. Jón Ólafsson er tónlistastjóri og Gunnar Helgason mun leikstýra verkinu. Búið er að ráða í aðalhlutverkið en Ingólfur Þórarinsson poppstjarna og fótboltkappi mun bregða sér í hlutverk Buddy Holly. Þetta er ekki í fyrsta sinn sem hann leggur leiklistina fyrir sig en Ingólfur fór með hlutverk í íslensku sjónvarpsþáttaröðinni Réttur í fyrra.

Jón segir hlæjandi að þeir hafi heillast af sjarma Ingólfs í Iceland Express auglýsingunni. „Ingó var frábær í þeim auglýsingum og sýndi geysilega góða takta. Svo hefur hann oft látið hafa það eftir sér í viðtölum að hann vilji leggja leiklistina fyrir sig," segir Jón en þeir hafi fulla trú að veðurguðinum.

„Við þurftum að fá einhvern sem var fyrst og fremst góður tónlistamaður, sem Ingó er. Hlutverkinu fylgir að vera með gítarinn og vera sönglandi nánast allan tímann. Ég held við hefðum ekki fundið einhvern með báða þessa kosti í leikarageiranum." Jón segir að Ingólfur sé hógvær og viljugur til að læra."Hann gengur inn í þetta með opnum huga og ég er viss um að hann tækli þetta vel. Svo er hann líka bara svo góður drengur."

Aðstandendur sýningarinnar eru að leita að óþekktum sem þekktum andlitunum til að leika við hlið Ingó í söngleiknum en haldnar verða opnar prufur þann 27.júní næstkomandi.

„Það er alltaf gaman að finna ný andlit í bransann en svo er áætluð frumsýning í byrjun október þegar öll atvinnuleikhúsin er á fullu. Þetta verður því blanda af atvinnumönnum og áhugamönnum sem bera upp sýninguna." Þeir eru meðal annars að leita að tveimur þeldökkum söngvurunum í sýninguna. „Ég vona að við finnum tvo góða en ef ekki þá gerum það sama og við Baltasar Kormákur gerðum í uppsetningu á Hárinu þegar við sminkuðu Ingvar Sigurðsson alveg dökkann. Það er b-planið." -áp