Mús í útrás

Barnabókin Maxímús Músíkús kom nýverið út í Suður-Kóreu og hefur þegar ratað inn á metsölulista vinsælla barnabóka þar í landi. Í sögunni segir frá músinni Maxímús, sem villist inn í tónlistarhús þar sem heil sinfóníuhljómsveit er að hefja æfingu.

Músin lærir hvað hljóðfærin heita og hvers konar hljóð þau gefa frá sér og gefst að lokum tækifæri til að hlusta á tónleika innan um prúðbúna tónleikagesti. Með kóresku útgáfunni fylgir geisladiskur alveg eins og í íslensku útgáfunni og hafa því kóresk börn haft tækifæri til að hlýða á flutning Sinfóníuhljómsveitar Íslands, meðal annars á laginu „Á Sprengisandi“. Fjölmargir aðrir útgefendur og tónleikahaldarar víðs vegar um heim hafa lýst yfir áhuga og ánægju með bókina og má því búast við frekari útrás.

Höfundarnir, Hallfríður Ólafsdóttir og Þórarinn Már Baldursson, sem bæði leika með Sinfóníuhljómsveit Íslands, leggja nú lokahönd á aðra bók um Maxímús. Sú mun gerast í tónlistarskóla. Sinfóníuhljómsveit Íslands mun endurtaka leikinn í apríl og skipuleggja tónleika fyrir yngstu hlustendurna í tengslum við bókina. Verða þá ungir einleikarar í fararbroddi.