Japanir fylgja Hollendingum í 16-liða úrslitin

Japan og Holland unnu leiki sína í lokaumferð E-riðils á HM í Suður-Afríku. Japanir sáu til þess að Danir eru nú úr leik í keppninni með 3-1 sigri í leik liðanna í kvöld.

Japanir komust yfir með tveimur mörkum beint úr aukaspyrnu í fyrri hálfleik. Thomas Sörensen, markvörður Dana, átti ekki sinn besta dag og var nærri búinn að missa þriðju aukaspyrnuna inn í markið en boltinn hafnaði þó í stönginni. Það voru þeir Keisuke Honda og Yasuhito Endo sem komu Japönum yfir í leiknum.

Þeir japönsku áttu fyllilega skilið að komast áfram miðað við frammistöðu liðsins í kvöld. Danir náðu reyndar að klóra í bakkann með marki Jon Dahl Tomasson á 81. mínútu. Hann tók vítaspyrnu sem Kawashima varði í marki Japana en náði að fylgja eftir skotinu og skora af stuttu færi.

En Japanir kórónuðu frábæran leik með þriðja markinu á 87. mínútu. Þeir fóru þá illa með dönsku vörnina og lauk sókninni með því að Shinji Okazaki renndi boltanum yfir marklínuna.

Hollendingar fara inn í 16-liða úrslitin með fullt hús stiga eftir 2-1 sigur á Kamerún í kvöld. Kamerúnar hlutu því ekkert stig í keppninni og eru á leiðinni heim, rétt eins og Danir.

Robin van Persie kom Hollandi yfir á 36. mínútu leiksins en Samuel Eto'o jafnaði metin fyrir Kamerún er hann skoraði úr vítaspyrnu á 65. mínútu.

Varamaðurinn Klaas-Jan Huntelaar skoraði svo sigurmark Hollendinga undir lok leiksins er hann fylgdi eftir skoti annars varamanns, Arjen Robben, sem hafnaði í stönginni.

Holland mætir Slóvakíu í 16-liða úrslitunum á mánudaginn en á þriðjudag eigast við Paragvæ og Japan.