Barði tilnefndur í Gautaborg

Kvikmyndahátíðin í Gautaborg stendur nú yfir. Þetta er stærsta kvikmyndahátíðin á Norðurlöndum og ein af stærstu kvikmyndahátíðum í heimi. Verðlaun verða veitt annað kvöld í hinum ýmsu flokkum, meðal annars fyrir bestu tónlist í norrænni bíómynd. Þar er Barði Jóhannsson meðal fimm tilnefndra, en Barði er tilnefndur fyrir músíkina í kvikmynd Óskars Jónassonar, Reykjavík-Rotterdam. Það er til mikils að vinna, aðalverðlaunin eru eitt hundrað þúsund sænskar krónur, rúmlega 1.7 milljónir íslenskar. „Það er eitthvað,“ segir Barði, sem er kominn til Gautaborgar. „Þetta er í fyrsta skipti sem þessi verðlaun eru veitt á hátíðinni og þetta er mjög skemmtilegt fyrir mig.“ Barði fékk Edduverðlaun fyrir sömu músík árið 2008. „Þá var ég spila í útlöndum og gat ekki tekið á móti verðlaununum. Gat hvorki þakkað Óskari né Einari Tönsberg, sem á stóran hlut í þessari músík. Ég er ekki búinn að undirbúa ræðuna og kann hvorki sænsku né finnsku. Ég kann reyndar nokkur orð í latínu.“ Barði segist ekki ætla að vera í kjólfötum þegar hann mætir á verðlaunaafhendinguna á laugardalskvöldið - „enda getur James Bond bara séð um það. Ég er alltaf í sömu fötunum á svona hátíðum, gömlum seventís jakkaföt sem ég keypti einhvern tímann.“ Nýjustu verkefni Barða eru að gera músík í nýrri syrpu af Rétti á Stöð 2 og svo gerir hann músík fyrir bandaríska heimildarmynd um brimbrettasportið. Á Gautaborgarhátíðinni er kvikmynd Dags Kára Péturssonar, The Good Heart, einnig tilnefnd. Dagur Kári hefur verið sigursæll á hátíðinni. Árið 2003 hlaut mynd hans Nói Albinói þrenn verðlaun og Voksne Mennesker hlaut aðalverðlaunin árið 2006. - drg