Auðkýfingaeinelti á Búðum

„Okkur vorur boðnar mjög háar upphæðir frá auðkýfingunum fyrir aukalög þegar böllin voru að klárast. Það var ekki verið að bjóða neina 2.000 krónu seðla heldur fleiri tugi þúsunda," segir Franz Gunnarsson, gítarleikari Búðarbandsins, Ensími og fleiri hljómsveita.

Búðarbandið kemur saman á ný um þar næstu helgi, en Franz er í hljómsveitinni ásamt Þórdísi Claessen og Bryndísi Ásmundsdóttir leikkonu. Hljómsveitin dregur nafn sitt af Hótel Búðum, enda var hún um tíma nokkurs konar húsband hótelsins. Á tíma góðærisins komu auðkýfingar mikið saman á Hótel Búðum og urðu meðlimir bandsins oft vitni að þeim leikskólaleik sem auðkýfingarnir voru í.

„Auðkýfingarnir mættu á heilu bílflotunum af glænýjum, svörtum, Mercedes Benz jeppum og jafnvel snekkjum og þyrlum þessa stuttu leið úr Reykjavík," segir Franz. „Eitt sinn urðum við vitni að því að einn þeirra mætti á um það bil ársgömlum Benz. Þegar hann kom inn varð hann fyrir þvílíku einelti frá hinum fyrir að vera á gömlum bíl. Maðurinn reyndi að afsaka sig með því að hann væri að bíða eftir nýjum, en var hálf púaður út í horn fyrir gamla bílinn sinn," segir Franz þegar hann rifjar upp ruglið sem fylgdi góðærinu.

Liðin eru hátt í tvö ár frá því að bandið spilaði síðast saman. Þórdís er í námi í New York og Bryndís býr á Akureyri en þau ætla að nota tækifærið nú seinna í júlí þegar þau verða öll á sama stað og gleðja aðdáendur sína. Það verða tvennir tónleikar, 23. og 24. júlí á Prikinu.

„Við vorum farin að minnka spilamennskuna á Hótel Búðum. Stemningin sem fylgdi þessu var bara ekki sú sama og á gamla hótelinu og við vorum farin að spila meira hér í bænum. Þetta hefur svo legið niðri síðan við fórum öll í sitthvora áttina en nú er kominn tími til að koma aðeins saman aftur," segir Franz.