Allt á fullu hjá Rúnari Eff

Akureyski tónlistarmaðurinn Rúnar Eff hefur sent frá sér myndband við lagið Holding Out for a Hero sem var upphaflega flutt af Bonnie Tyler árið 1984 og hljómaði í myndinni Footloose.

Jana María Guðmundsdóttir úr söngleiknum Rocky Horror leikur á móti Rúnari í myndbandinu. „Það var bara frábært,“ segir Rúnar um samstarfið við Jönu. „Hún skólaði mig bara til. Ég hef ekki mikla reynslu af því að leika en hún hjálpaði mér heilmikið. Svo sér hún um flest dramaatriðin þannig að það reyndi svo sem ekki stórlega á mig.“

Þetta er annað myndbandið sem Rúnar gerir en það fyrsta gerði hann við annað tökulag, Aha-lagið Take on Me, fyrir þremur árum. Lagið Holding Out for a Hero verður á annarri sólóplötu Rúnars sem er væntanleg snemma á næsta ári.

En af hverju tók hann þetta lag upp á sína arma?

„Ég er mikið að trúbadorast og hef gaman af því að fikta í lögum sem fólk býst ekki við að svona trúbador sé að fara að spila. Ég fór að fikta í þessu lagi og fannst það bjóða upp á fleiri möguleika en upphaflega útgáfan gerði. Ég ákvað að rífa allt utan af því og prófa að byggja upp á nýtt.“

Rúnar er alltaf með annan fótinn í Danmörku þar sem hann bjó um árabil. Þar spilar hann reglulega og fær alltaf mjög góðar móttökur, enda þekktur úr danska raunveruleikaþættinum All Stars þar sem hann komst í úrslit fyrir tveimur árum. - fb