Stikla Harðskafa slær í gegn

Það eru ekki bara íslensk forlög sem leggja sig öll fram við að kynna bækur sínar. Bókaforlagið Random House réðst til að mynda í gerð mjög metnaðarfullrar stuttmyndar til að kynna ensku útgáfuna af Harðskafa, eða Hypothermia eins og hún heitir upp á ensku.

Eistneski leikstjórinn Tanel Toom var fenginn til að leikstýra myndinni sem er auðvitað öll á ensku. Stiklan hefur þegar náð mikilli hylli og mun keppa um titilinn Besta bókamyndbandið árið 2010 sem Random House, bókakeðjan Foyles, fagtímaritið Bookseller og The National Film and Tele­vision School í London standa að. Stiklan fyrir Harðskafa keppir meðal annars við stiklu fyrir nýjustu verk James Ellroy og Jens Nesbø.

Netkosningin stendur yfir á heimasíðu Foyle. til 15. október. Athygli vekur að Erlendur Sveinsson í bókastiklunni er mun eldri en til að mynda Ingvar E. Sigurðsson sem mörgum fannst fullungur í hlutverkið í frægri mynd Baltasars Kormáks, Mýrinni. Það kom þó ekki að sök því Mýrin er ein aðsóknarmesta kvikmynd Íslandssögunnar.

Hypothermia, eða Harðskafi, hefur raunar fengið mikla umfjöllun í bæði enskum og bandarískum fjölmiðlum en New York Times gaf henni meðal annars mjög góða dóma nýverið. -fgg

Hægt er að horfa á stiklurnar á síðu verðlaunanna á YouTube og einnig kjósa á heimasíðu Foyle.