Systkini spila döbb

Hljómsveitin Ojba Rasta er níu manna döbb-hljómsveit sem spilar á Bakkusi í kvöld. Í bandinu eru fjögur alsystkini, Unnur, Valgerður, Gylfi og Arnljótur Sigurðarbörn. Gylfi og Arnljótur hafa líka spilað með Berndsen. „Við byrjuðum að spila tökulög fyrst en svo nenntum við því ekki, nú er allt frumsamið,“ segir Arnljótur. „Þetta er þykkt, hefí, hægt og kraftmikið. Mikið brass og smá bíómyndaáhrif á köflum.“

Döbb er ósungin reggí-tónlist, hnausþykk og víruð. Arnljótur segir að bandið hafi pælt í því að kalla músíkina dufl, en það nái ekki alveg meiningunni. Hann er mikill reggí-áhugamaður.

„Ég kynntist þessari músík í gegnum kunningja minn fyrir löngu og svo varð ég eiginlega alveg sjúkur. Safna plötum og hef lesið allt sem ég get um jamaíska tónlist. Ég er aðeins búinn að slaka á gagnvart þessu að undanförnu því á tímabili var þetta bara orðið of mikið. Ég hef ekki komið til Jamaíka enn þá, en margoft í huganum.“

Auk Ojba Rasta kemur hljómsveitin Crackers fram, en Crackers, sem er fjögurra manna, spilar líka döbb-tónlist. Meðlimir bandanna eru partur af hópnum History Sounds, en hann er hugsaður sem þak yfir allt sem viðkemur döbbmenningu á Íslandi. History Sounds hefur haldið nokkur tónlistarkvöld undanfarið við góðar undirtektir. Í lok tónleikanna munu bæði böndin hjálpast að svo úr verður 12 manna döbb-stórsveit. Kvikmyndin Rockers verður sýnd áður en böndin byrja, en þetta er mögnuð heimildarmynd um lífið í fátækari hverfum Kingston, höfuðborg Jamaíka. Bíóið hefst kl. 21 en böndin byrja að spila kl. 23. Frítt er inn en tekið er við frjálsum framlögum. - drg