Bjarni samdi við Mechelen

Bjarni Þór Viðarsson skrifaði í dag undir þriggja ára samning við belgíska úrvalsdeildarfélagið Mechelen.

Bjarni lék síðast með KSV Roeselare sem féll úr úrvalsdeildinni í Belgíu í vor. „Ég er mjög ánægður með þetta. Þetta er góður klúbbur sem stefnir að því að bæta árangur síðasta tímabils," sagði Bjarni við Vísi en Mechelen varð í sjöunda sæti á nýliðnu tímabili.

„Mér líst líka vel á að vera áfram í Belgíu. Þetta er sterk deild sem er að verða betri. Svo kemur í ljós hvað gerist á næstu árum."

Bjarni meiddist á hné undir lok síðasta tímabils en hefur náð sér góðum af þeim.