Verður Hjálmum aftur hent af sviðinu?

Aldrei fór ég suður, hin mikla tónlistarhátíð á Ísafirði, verður haldin í sjöunda skipti um páskana. Að vanda úir og grúir af alls kyns tónlist, en aldrei hafa verið jafnmörg atriði og núna, 37 samtals. Meðal þess heitasta er ísfirska rokkbandið Nine elevens, sem poppar upp á nokkurra ára fresti með eldgíturum og látum. Annað frægt vestfirskt rokkband á Aldrei er Urmull, sem hefur ekki spilað lengi. Þeir gáfu út plötu sem var illa unnin og umslagið það ljótasta í sögu Íslands. Þessi plata er nú að koma út aftur þar sem Ben Frost endurmasterar og Svavar í Skakka­manage „rímixar" umslagið.

Reggae-boltarnir í Hjálmum snúa nú aftur, en eitt frægasta augnablik Aldrei-hátíðarinnar var þegar hinn frægi Ísfirðingur Dóri Hermanns henti þeim af sviðinu af því honum fannst þeir svo leiðinlegir. Líkur eru taldar á að Dóri kynni Hjálma aftur á svið svo það er ómögulegt að segja fyrir um það hvað þeir fá að spila mörg lög í ár. Rúnar Þór, síðasti töffarinn á landinu, mætir í leðurjakkanum með Ray Ban-gleraugun og sítt að aftan og tekur nokkur lög. Mugison verður þarna að sjálfsögðu, en hann er sá eini sem fær alltaf að spila, og Muggi, pabbi Mugisons, kemur fram með hljómsveitinni Yxnu.

Önnur bönd sem spila á þessum tveimur dögum sem hátíðin stendur yfir eru meðal annars Morðingjar, Bloodgroup, Dikta, Hjaltalín og Ingó og Veðurguðirnir. Einnig verða söngkonurnar Lay Low, Ólöf Arnalds, Sigríður Thorlacius og Lára Rúnars á svæðinu sem og gríngengið Mið-Ísland. Að vanda er ókeypis inn á allt saman. - drg