Forseti Frakklands fundar um franska landsliðið

Nicolas Sarkozy, forseti Frakklands, mun fara yfir málefni franska knattspyrnulandsliðsins á ríkisstjórnarfundi í dag. Forsetinn ætlar einnig að ræða við Thierry Henry, leikmann liðsins, til þess að fá fréttir af því hvað hafi eiginlega gengið á bak við tjöldin.

Francois Fillon forsætisráðherra, Roselyne Bachelot íþróttamálaráðherra og Rama Yade aðstoðaríþróttamálaráðherra munu funda með Sarkozy í dag og leita svara við því hvernig land sem varð heimsmeistari 1998 og komst í úrslit árið 2006 fór að því að skora aðeins eitt mark á HM í ár.

"Þeir sem bera ábyrgð á þessari hörmung verða að taka afleiðingunum. Fyrst leikmennirnir og síðan þeir sem stýra liðinu. Á eftir þeim er síðan knattspyrnusambandið," sagði Bachelot.

Franskir fjölmiðlar hafa grillað landsliðið síðustu daga og í einni fyrirsögn í dag stóð: "Endalok heimsins".

Raymond Domenech þjálfari fær versta útreið. Er sakaður um að hafa fólk að fíflum og vinsamlegast beðinn um að hverfa af yfirborði jarðar sem fyrst.