Malouda biðst afsökunar

Franski landsliðsmaðurinn hefur beðið stuðningsmenn landsliðsins afsökunar á hörmulegri frammistöðu liðsins á HM í Suður-Afríku.

Frakkar komust á HM með svindlmarki gegn Írum og gerðu svo algjörlega í buxurnar á mótinu. Skoruðu aðeins eitt mark og það mark skoraði Malouda.

"Ég vil fyrir hönd leikmanna biðja stuðningsmennina afsökunar á frammistöðu okkar. Við erum ekki stoltir af því sem við gerðum. Menn höguðu sér ekki vel og ég veit ekki alveg hvernig á að fyrirgefa okkur," sagði auðmjúkur Malouda.

"Þetta mót hefur verið eitt stórslys. Við ætluðum okkur miklu meira og vildum heldur ekki verða þjóðinni til skammar. Patrice Evra vildi halda blaðamannafund fyrir lokaleikinn en var tjáð að það væri ekki rétti tíminn.

Kannski brugðumst við illa við með því að fara í verkfall eftir að Anelka var sendur heim en við kunnum illa við að honum væri refsað fyrir eitthvað sem var á ábyrgð hópsins. Það var enginn svindlari í þessum hópi. Við vorum fórnarlömb slæmra ákvarðana sem voru teknar undir pressu. Við brotnuðum."