England verður að vinna

Úrslit í C-riðli HM í Suður-Afríku ráðast rétt fyrir fjögur í dag en klukkan tvö verður blásið til leiks í síðustu leikjum riðilsins.

Slóvenía er á toppi riðilsins og nægir því jafntefli til þess að komast áfram. England verður að sama skapi að vinna til þess að gulltryggja farseðilinn í sextán liða úrslit.

Nái Bandaríkjamenn að sigra Alsír eru þeir einnig gulltryggðir áfram. Jafntefli gæti dugað Könunum fari svo að Slóvenar nái góðum úrslitum gegn Englandi.

Leikur Englendinga og Slóvena verður á Rúv en leikur Bandaríkjanna og Alsír á Stöð 2 Sport 2.