Gerrard: Mörkin handan við hornið hjá Rooney

Steven Gerrard, fyrirliði enska landsliðsins, hrósaði Wayne Rooney eftir sigur Englands á Slóveníu í dag.

Rooney hefur enn ekki skorað á HM í Suður-Afríku til þessa en hann átti til að mynda skot sem var varið í stöngina í dag. England vann leikinn, 1-0, og er komið áfram í 16-liða úrslitin.

„Wayne hefur verið gagnrýndur fyrir fyrstu tvo leikina á mótinu en hann var mjög duglegur í dag og sýndi hvað hann getur," sagði Gerrard eftir leikinn.

„Ég veit að mörkin eru rétt handan við hornið hjá honum," bætti hann við.

Hann viðurkenndi að það hefði verið þægilegra að skora annað mark í dag.

„Þegar það þarf nauðsynlega að vinna leikinn og það tekst ekki að klára andstæðinginn verða lokamínúturnar mjög taugastrekkjandi. En við áttum það svo sannarlega skilið að komast áfram. Mér fannst allir sem tóku þátt í leiknum í dag standa sig framúrskarandi vel."

„Við þurfum nú að finna stöðugleika fyrir leikina framundan í útsláttarkeppninni. Ég tel að ef við spilum eins og við gerðum í dag og hlustum áfram á þjálfarann og gerum eins og hann vill þá höfum við það sem til þarf til að vinna leiki. Það er allt mögulegt."

Hann viðurkenndi einnig að stemningin í búningsklefanum væri mun betri nú. „100 prósent betri. Ef okkur tekst að sýna okkar bestu hliðar getum við mætt hvaða liði sem er."