Capello: Þetta er liðið sem ég þekki

Fabio Capello landsliðsþjálfari Englands var vitanlega hæstánægður með sigur sinna manna á Slóveníu á HM í Suður-Afríku í dag.

Með sigrinum tryggði England sér annað sæti C-riðils og þar með sæti í 16-liða úrslitunum. Leikur Englands fer fram á sunnudag klukkan 14.00.

„Við spiluðum saman, börðumst saman og ég er virkilega ánægður með úrslitin," sagði hann í sjónvarpsviðtali eftir leik.

„Liðið getur nú haldið fram á veginn. Hugur okkar leikmanna og þjálfara er frjáls. Við getum nú haldið áfram óttalausir. Þetta var liðið sem ég þekki."

Jermain Defoe var hetja Englands í leiknum en hann skoraði eina mark leiksins um miðbik fyrri hálfleiks.

„Ég er orðlaus. Þvílíkt augnablik," sagði hann. „Það voru allir mjög einbeittir fyrir þennan leik. Við erum nú komnir áfram og það er það mikilvægasta."