Jennifer hneyksluð á Courteney

Leikkonan Courteney Cox-Arquette segir að vinir hennar hafi hneykslast á þeirri ákvörðun hennar að koma nakin fram í sjónvarpsþáttunum Cougar Town. Hún segist þó ekki sjá eftir neinu, það hafi verið mikilvægt að sýna hvernig „alvöru konur líti út“.

Í sjónvarpsþáttunum Cougar Town leikur Courteney konu sem á í ástarsambandi við fjölda yngri manna. Í þáttunum kemur hún nakin fram. „Mér fannst þetta mikilvægt. Í þættinum er fjallað um alvöru hluti og alvöru lífsreynslu svo mér fannst ég verða að gera þetta. Ég veit að Jennifer Aniston, vinkona mín, var hneyksluð á mér. Sumt fólk vill eflaust ekki sýna þá hluta af sér sem ekki eru fullkomnir og það er í góðu lagi. Ég ákvað að sýna þá og mér er alveg sama. Það var mikilvægt að sýna hvernig það er raunverulega að vera orðin fertug,“ segir Courteney.

Þó Courteney hafi ekkert á móti því að sýna sig á skjánum leggur hún mikla áherslu á að hún sé í eins góðu formi og mögulegt er. „Ég legg mikið á mig. Ég geng, ég hleyp, ég æfi í skíðavél, lyfti og dansa. Ég spila tennis og borða hollan mat,“ segir hún.