Hélt fimm tónleika á Fjóni

„Þetta gekk alveg ótrúlega vel. Ég er enn þá í skýjunum,“ segir söngkonan Guðný Gígja Skjaldardóttir frá Patreksfirði. Hún er nýkomin heim eftir níu daga ferð til Fjóns í Danmörku þar sem hún hélt fimm tónleika fyrir heimamenn.

„Þetta var rosalega skemmtilegt. Ég prófaði alla aldurshópa og söng bæði á elliheimili og í grunnskóla. Það er eiginlega draumi líkast hvað þetta gekk vel. Ég á enn þá erfitt með að þurrka af mér brosið,“ segir Guðný Gígja, sem var þarna að halda sína fyrstu tónleika erlendis. Hún lýsir tónlistinni sinni sem rólegri með þjóðlagaívafi. Auk þess að spila eigin lög á Fjóni söng hún lög eftir aðra, þar á meðal Presley-slagarann Love Me Tender sem hitti rækilega í mark.

Það voru forráðamenn norræna félagsins í Bogense á Fjóni sem buðu Guðnýju í heimsókn og kostuðu ferðalagið eftir að hafa séð hana á tónleikum á síðasta ári á Patreksfirði. Kom þetta fram á síðunni Patreksfjordur.is. Þar var haldið norrænt vinabæjarmót þar sem þátttakendur frá öllum vinabæjum Vesturbyggðar voru samankomnir, eða frá Bogense í Danmörku, Svelvik í Noregi, Vastena í Svíþjóð og Naantali í Finnlandi.

Guðný fékk einnig að taka upp fjórtán lög í hljóðveri á Fjóni og kann hún heimamönnum bestu þakkir fyrir það. Hún fer aftur út í ágúst og spilar á stærri tónleikum. Með henni í för verður vinkona hennar, Bjartey Sveinsdóttir, sem myndar með henni dúettinn Mistur. - fb