Ég yrði ómöguleg ef ég færi að læra eitthvað um listina

Jónína Katrín Jónsdóttir, Jenný, er sjálfmenntuð alþýðulistakona. Hún sýnir verk sín í Gerðubergi um þessar mundir.

„Það eru engar fyrirmyndir,“ segir alþýðulistakonan Jenný (Jónína Katrín Jónsdóttir), sem nú sýnir í Gerðubergi.

„Ég byrjaði bara á þessu allt í einu því ég hafði ekkert að gera. Var búin að prjóna peysur og sauma en var orðin leið á því. Ég átti tauliti og fékk mér léreft inn í skáp og byrjaði að mála. Þetta bara kom einhvern veginn. Svo fór ég að leika mér með akrýl á striga og svo hef ég límt myndir á striga og málað með akrýl á milli og stundum með krít. Þetta er bara skemmtilegt.“

Jenný segist hafa verið þunglynd þegar henni var boðið að sýna í Gerðubergi og því kallar hún sýninguna „Það kviknaði líf“.

„Ég málaði mikið. Það eru einhverjar 20-30 myndir á sýningunni og það hefur gengið vel að selja. Það eru ellefu seldar, enda eru þær á góðu verði. Þetta er fyrsta einkasýningin mín og það er bara mjög gaman að standa í þessu.“

Jenný er sjálfmenntuð í listinni. „Ég hef satt best að segja engan áhuga á að mennta mig því þetta kemur bara fram úr erminni. Ég byrja og svo kemur þetta bara. Ég held ég yrði bara ómöguleg ef ég færi að læra eitthvað. Ég verð að leika mér með litina sjálf. Ég fór reyndar á eitt námskeið en það kom ekkert flott út úr því. Þá urðu myndirnar bara líkar einhverju öðru. Ég vil það ekki.“

Jenný er fædd á Sauðárkróki árið 1955. Hún er snyrtifræðingur að mennt og lærði í því námi litafræði. Sýningin í Boganum í Gerðubergi stendur yfir til 21. mars.drgunni@frettabladid.is