Umboðsmaður vildi Thin Jim

Hljómsveitin Thin Jim and the Castaways hefur breytt nafninu sínu í Thin Jim. Ástæðan er sú að bandarískur umboðsmaður sveitarinnar taldi styttra nafnið henta útvarpsmönnum betur.

„Richard, umboðsmaðurinn okkar í Bandaríkjunum, bað okkur að stytta nafnið einfaldlega vegna þess að sumir útvarpsmenn eru svo latir að þeir taka fyrr við sér ef bönd hafa stutt og hnitmiðuð nöfn,“ segir Jökull Jörgensson úr Thin Jim. „Svo við breyttum þessu snarlega. Svona er nú bransinn.“

Sveitin er að reyna að koma sér á framfæri í Bandaríkjunum með hjálp umboðsmannsins, sem hefur sent fjögur lög hennar til fjölda útvarpsstöðva. „Ég sendi honum fjögurra laga plötu í 300 eintökum og hann kom þeim á 300 útvarpsstöðvar víðs vegar um Bandaríkin og Kanada,“ segir Jökull og bætir við að lög sveitarinnar séu spiluð reglulega á tólf útvarpsstöðvum, sem sé bara hið besta mál. Stefnan hefur síðan verið sett á plötuútgáfu og bíður Thin Jim eftir því að góður samningur detti á borðið. Spilamennska í Bandaríkjunum er einnig í farvatninu.

Næstu tónleikar sveitarinnar verða í bíósal Hótel Loftleiða á föstudaginn klukkan 21. Bíósalurinn er vel varðveitt leyndarmál í Reykjavík en þar varði Bobby Fischer löngum stundum meðan á einvígi hans við Boris Spasskí stóð. - fb