Etja kappi við sveitunga sína

Dálítið sérstök staða er komin upp í spurningaþættinum Útsvari því í undanúrslitum næsta föstudag mætast Dalvíkurbyggð og Reykjavík. Tveir liðsmanna Reykjavíkur, þau Stefán Eiríksson, lögreglustjóri á höfuðborgarsvæðinu, og Svanhildur Hólm Valsdóttir, framkvæmdastjóri þingflokks Sjálfstæðisflokksins, hafa töluverðra hagsmuna að gæta á Dalvík og eru í erfiðri stöðu.

Lögreglustjórinn á fjölda ættingja á Dalvík og Svanhildur og eiginmaður hennar, Logi Bergmann Eiðsson, eiga hús í bænum og sennilega er helmingur bæjarbúa skyldur Svanhildi með einhverjum hætti.

„Þetta var ekki mitt fyrsta val. Þegar ég sá að Dalvíkurbyggð væri komin áfram þá hugsaði ég með mér að þessi tvö lið mættu ekki mætast,“ segir Svanhildur en sú ósk rættist ekki. Hún vonast þó til að Dalvíkingar erfi þetta ekki við hana. „Reyndar held ég að þeir geri það ekki, þetta er mikið öðlingsfólk og ég vona að þeir skilji að ég bað ekki um þessa viðureign.“

Stefán Eiríksson óttast ekki að honum verði úthýst úr öllum kaffiboðum á Dalvík. „Við verðum bara að sjá hvernig þetta fer, ég vona að ég eigi inni kaffiboð þegar þessu verður lokið. Við Svanhildur erum með þannig keppnisskap að við stefnum á að vinna þetta.“

Svanfríði Ingu Jónasdóttur, bæjarstjóra í Dalvíkurbyggð, þykir þetta afleit staða en svona geti þetta stundum verið.

„Svanhildi verður allavega ekki vísað úr bænum. Annars eiga þau bæði tvö samúð mína skilda, mamma hans Stefáns var nefnilega í gagnfræðiskólanum hér,“ segir Svanfríður.

- fgg