Sevilla segir verðmiðann á Zokora of háan

Forráðamenn spænska félagsins Sevilla og enska úrvalsdeildarfélagsins Tottenham hittust nýverið til þess að leggja lokahönd á bótagreiðslur vegna knattspyrnustjórans Juande Ramos sem yfirgaf Sevilla fyrir Tottenham árið 2007.

Tilefnið var einnig notað til þess að ræða áhuga spænska félagsins á miðjumanninum Didier Zokora hjá Tottenham en stjórnarformaðurinn Jose Maria Cruz hjá Sevilla telur ólíklegt að af félagsskiptunum verði þar sem enn sé himinn og haf á milli þess að félögin nái saman um kaupverð.

„Það er rétt að við höfum áhuga á Zokora en munurinn á verðinu sem við viljum borga og því sem Tottenham vill fá fyrir hann er það mikill að ólíklegt er að af þessu verði. Zokora er heldur ekki eini möguleikinn fyrir okkur," segir Cruz.