Innlent

Hinir handteknu fluttir á lögreglustöðina

Mótmælendurnir sem voru handteknir í alþingisgarðinum fyrr í dag voru fluttir inn í þinghúsið og þaðan í lögreglubíla í bílakjallara sem er undir Alþingishúsinu. Pattstaða hefur verið í garðinum þar sem mótmælendur hafa neitað að fara þaðan og lögregla hafði því ekki getað komið hinum handteknu á brott. Þeir hafa nú verið fluttir á lögreglustöðina við Hverfisgötu.

Þegar lögregla ætlaði að keyra út með þá handteknu fjölmenntu mótmælendur fyrir hlið bílakjallarans svo lögreglubíllinn komst ekki út. Mótmælendur bæði fyrir innan og utan bílakjallarann æptu slagorðið „Vanhæf ríkisstjórn".

Mótmælendurnir sem stóðu fyrir utan hliðið reyndu síðan að taka niður öryggismyndavél sem þar var og beitti lögreglan þá piparúða á hópinn.

Um hundrað lögreglumenn voru í garðinum og þegar mótmælendum varð ljóst að verið væri að færa hina handteknu inn í þinghúsið færðist aukin harka í leikinn sem endaði með því að þrír til viðbótar voru handteknir. Lögregla beitti piparúða á mótmælendurna eins og hún hefur gert ítrekað í dag.








Tengdar fréttir

Óttast mótmæli við landsfund Sjálfstæðisflokksins

Þorgerður Katrín Gunnarsdóttir, varaformaður Sjálfstæðisflokksins, telur líklegt að mótmælendur muni reyna að trufla landsfund flokksins sem haldinn verður í lok mánaðarins. Hún biður fólk um að beita ekki ofbeldi. Þetta sagði Þorgerður í viðtali við Rás 2 fyrir stundu sem sent var beint úr Alþingishúsinu.

Pattstaða í Alþingisgarðinum

Fólki hefur fjölgað á ný fyrir aftan Alþingishúsið og er lögregla að reyna að tæma garðinn. Um tíu manns sem hafa verið handteknir eru í einu horni garðsins og virðist sem lögregla sé að reyna að tæma garðinn til þess að koma þeim handteknu á brott. Að sögn fréttamanns sem er á staðnum er allt á suðupunkti í garðinum og hefur piparýða verið beitt nokkrum sinnum.

Sérsveitarmenn við þinghúsið

Lögreglan er með mikinn viðbúnað fyrir framan Alþingishúsið og hefur fjöldi sérsveitarmanna með hjálma, skyldi og kylfur verið kallaðir til. Mótmælendur framkalla mikinn hávaða, berja glugga þinghússin að utan, snjóboltum hefur verið kastað í þinghúsið og þá heyrast vörubíla þeyta flautur í útsendingu frá þingfundi sem hófst núna klukkan hálf tvö.

Mótmælt á Austurvelli í dag

Raddir fólksins boða til friðsamlegrar mótmælastöðu á Austurvelli í dag klukkan 13 þegar Alþingi kemur saman að nýju eftir jólaleyfi.

Piparúða beitt á mótmælendur - tíu í handjárnum

Lögreglan hefur hafist handa við að rýma Alþingisgarðinn þar sem hópur mótmælenda hafði komið sér fyrir. Að sögn fréttamanns á staðnum hefur táragasi verið beitt til þess að koma fólkinu í burtu. Þingfundur stendur enn yfir í Alþingishúsinu þrátt fyrir að lúðraþytur og köll heyrist gjörla í sjónvarpsútsendingu frá fundinum.

Kröftug mótmæli við Alþingishúsið

Rúmlega þúsund manns eru nú á Austurvelli þar sem boðað hefur verið til mótmæla þegar þingfundur hefst á ný eftir jólafrí. Lögregla strengdi borða fyrir framan húsið og upphófust stimpingar á milli lögreglu og mótmælenda sem vildu fara inn fyrir borðann. Hópur fólks hefur einnig komið sér fyrir í Alþingisgarðinum.

„Snautleg byrjun á þinghaldinu"

Þingmenn stjórnarandstöðu lýstu yfir óánægju með störf þingsins við upphaf Alþingis í dag. Þingmennirnir sögðust undrast mjög að ástandið í þjóðfélaginu skyldi ekki rætt við upphaf fundar og farið væri yfir stöðu mála og framtíðarhorfur.

Mest lesið


Fleiri fréttir

Sjá meira


×

Mest lesið