Hafa áhyggjur af yfirlýsingu Eltons John

Alþjóðlegu barnahjálparsamtökin EveryChild hafa áhyggjur af því að yfirlýsing breska popparans Eltons John, þess efnis að hann og eiginmaður hans vilji ættleiða eins árs gamlan HIV-smitaðan dreng, geti leitt af sér að foreldrar yfirgefi börnin sín í meiri mæli. CNN greinir frá þessu.

Söngvarinn tók ástfóstri við drenginn Lev þegar hann heimsótti munaðarleysingjaheimili í Úkraínu á laugardag.

Talsmaður EveryChild segir að slíkar ættleiðingar milli landa hvetji ungar mæður í erfiðri stöðu til að koma börnum sínum fyrir á heimilum, í þeirri von að ríkir útlendingar geti séð betur fyrir þeim.