3-3 í frábærum leik Villa og Everton

Aston Villa og Everton skiptust á jafnan hlut í ensku úrvalsdeildinni í dag. Bæði lið skoruðu þrjú mörk í frábærum leik.

Everton byrjaði leikinn betur og komst yfir þegar Marouane Fellaini skoraði af stuttu færi eftir fyrirgjöf Leighton Baines. Tim Cahill skallaði svo í slánna eftir hornspyrnu en fylgdi eftir og stangaði boltann inn af millimetra löngu færi og kom Everton í 0-2.

Villa var ekki líklegt til afreka en það minnkaði muninn þegar John Carew þrumaði boltanum inn úr teignum. Heimamenn vöknuðu til lífsins við markið og byrjuðu stórsókn. Þeim tókst þó ekki að skora strax og staðan í hálfleik var 1-2.

Steven Pienaar kom Everton í 1-3 með fallegu skoti í upphafi síðari hálfleiks en Villa neitaði að gefast upp. James Milner minnkaði muninn með fallegu marki beint úr aukaspyrnu áður en Gareth Barry skoraði úr víti, sem dæmt var á Joleon Lescott. Hann reyndi að hreinsa frá með hjólhestaspyrnu en hitti bara Stilyan Petrov og Howard Webb benti á punktinn.

Fleiri urðu mörkin ekki þrátt fyrir nokkur færi, Villa fékk þau betri.

Villa er þar með átta stigum á eftir Arsenal í fimmta sæti en Everton einu stigi og einu sæti á eftir því.