Blackburn vann grannaslaginn

Blackburn vann í dag sigur á grönnum sínum í Burnley, 3-2, í ensku úrvalsdeildinni í knattspyrnu í dag.

Robbie Blake kom Burnley yfir strax á fimmtu mínútu leiksins en David Dunn jafnaði metin aðeins fjórum mínútum síðar.

Franco Di Santo og Pascal Chimbonda bættu svo við tveimur mörkum fyrir Blackburn áður en flautað var til leikhlés.

Chris Eagles náði svo að minnka muninn fyrir Burnley í uppbótartíma leiksins og þar við sat. Jóhannes Karl Guðjónsson var allan leikinn á varamannabekk Burnley.

Þetta var fyrsta viðureign liðanna í efstu deild á Englandi síðan 1966.

Klukkan 15.00 hefst leikur Wigan og Manchester City.