Wigan vann Boro í baráttunni um Watson

Ben Watson hefur ákveðið að ganga til liðs við Wigan Athletic en ekki Middlesbrough. Þessi tvö úrvalsdeildarlið bitust um leikmanninn sem Wigan kaupir á tvær milljónir punda frá Crystal Palace.

Watson hefur skrifað undir þriggja og hálfs árs samning eftir að hafa staðist læknisskoðun á JJB vellinum. Þessi 23 ára leikmaður mun hjálpa til með að fylla skarðið sem Wilson Palacios skildi eftir sig þegar hann fór til Tottenham.

Watson gæti spilað sinn fyrsta leik á miðvikudag þegar Wigan fær Liverpool í heimsókn. Steve Bruce, stjóri Wigan, lýsir Watson sem miðjumanni sem skili mörkum og sé enn að þroskast og taka framförum.

Tímabilið 2004-05 lék hann 21 leik í ensku úrvalsdeildinni þegar Crystal Palace var þar. „Það er frábært að vera aftur kominn í þessa deild. Ég vil þakka öllum hjá Palace, sérstaklega stuðningsmönnum sem hafa verið frábærir. Ég taldi bara þetta rétta skrefið fyrir mig á þessum tímapunkti," sagði Watson.