Torres: Owen hefur enn mikið fram að færa

Framherjinn Fernando Torres hjá Liverpool trúir því að Michael Owen gæti enn átt erindi í hvaða félag sem er í ensku úrvalsdeildinni en Owen lék sem kunnugt er með Liverpool á árunum 1996-2004 og skoraði þá 118 mörk í 216 leikjum með félaginu.

„Ég veit að Owen á sér stað í hjörtum aðdáenda Liverpool og í sögu félagsins. Hann er búinn að vera óheppinn með meiðsli síðustu ár og ég veit hvað það getur verið erfitt en hann er markaskorari frá náttúrunnar hendi. Ég veit ekki hvar hann muni leika á næstu leiktíð en ég er sannfærður um að hann hafi enn mikið fram að færa," segir Torres í samtali við Daily Mail.

Samningur Owen við b-deildarlið Newcastle er á enda runninn og talið er næsta víst að hann muni brátt snúa aftur í ensku úrvalsdeildina, en hvaða lið verður fyrir valinu á eftir að koma í ljós.

Aston Villa, Everton og Wigan hafa þegar lýst því yfir að þau séu ekki á eftir Owen.