Óli Stefán til Grindavíkur

Óli Stefán Flóventsson hefur ákveðið að ganga til liðs við sitt gamla félag, Grindavík, en hann fær leikheimild með félaginu þann 15. júlí næstkomandi.

Óli lék með Fjölni í fyrra en hélt til Noregs í haust þar sem hann hefur undanfarið leikið með Vard Haugasund í 2. deildinni þar í landi.

Óli Stefán er leikjahæsti leikmaður Grindavíkur í efstu deild frá upphafi en alls á hann að baki 183 leiki í efstu deild. Hefur hann skorað í þeim 32 mörk.

Þetta eru sérstaklega góðar fréttir fyrir Grindvíkinga í ljósi þess að Marko Valdimar Stefánsson verður frá næstu mánuðina eftir vinnuslys og auk þess er Bogi Rafn Einarsson að halda til náms í Bandaríkjunum í ágúst.