Óskar: Ég hrinti honum bara frá og því fór sem fór

„Gríðarlega skemmtilegur sigur og sterkur hjá okkur. Það er bara mikil jákvæðni í kringum KR núna og þessi sigur lofar góðu upp á framhaldið," segir miðjumaðurinn Óskar Örn Hauksson hjá KR sem var atkvæðamikill í 1-3 sigrinum gegn Val í VISA-bikarnum á Vodafonevellinum í kvöld.

Marel Jóhann Baldvinsson fékk sitt annað gula spjald og þar með rautt fyrir meint brot á Óskari Erni í byjrun seinni hálfleiks og Óskar Örn fékk svo stuttu síðar sjálfur beint rautt spjald eftir viðskipti sín við Reyni Leósson.

„Þetta gerist bara í hita leiksins. Ég var felldur og Reynir var bara mættur strax í andlitið á mér öskrandi á leikaraskap og eitthvað svoleiðis þegar ég var varla staðinn upp. Ég hrinti honum bara frá og því fór sem fór. Þetta atvik varð hins vegar til þess að kveikja þvílíkt í KR-ingum og ég á greinilega stóran þátt í þessum sigri," segir Óskar Örn og glottir við.