Bjarni Ólafur: Ömurlegt að tapa gegn KR

Fyrirliðinn Bjarni Ólafur Eiríksson hjá Val var afar óhress með spilamennsku síns liðs í 1-3 tapinu gegn erkifjendunum í KR á Vodafonevellinum í kvöld.

„Það er bara ömurlegt að tapa gegn KR og það á heimavelli okkar. Mér fannst þeir vera sterkari aðilinn stærstan hluta af leiknum og við vorum bara á eftir þeim í allt og mörgum hlutum.

Mér fannst við bara missa alla trú þegar þeir jafna leikinn. Við hættum bara og ég kann engar skýringar á því af hverju það gerðist. Við vorum bara slegnir út af laginu," segir Bjarni Ólafur.

„Það er bara skelfilegt að hugsa til þess að við séum fallnir út úr bikarnum því það var svona okkar möguleiki á að vinna titil í sumar," segir Bjarni Ólafur svekktur.